立法會財委會下周將舉行特別會議，審核政府2021/22財政年度開支預算，政府部門近日開始回覆議員早前提交嘅書面提問，其中公務員事務局話，上年7月中起要求各局或部門呈報員工確診新型冠狀病毒數字，截至今年3月15日錄得197宗，當中最多人感染嘅部門係警務處，有27宗。
第二多人確診新冠病毒嘅部門係消防處，有23宗；之後就係有19人確診嘅康文署、14人確診嘅食環署。房屋署、衛生署、司法機構等多個部門，亦有員工確診。
公務員事務局話非常關注僱員職安健，包括實施特別上班安排期間，除提供緊急同必須公共服務及參與抗疫嘅人員外，其他政府僱員會按實際運作需要盡量在家工作，以減少社區人流同社交接觸，有效阻止新冠病毒喺社區傳播。為保障員工同家人嘅健康同安全，各部門首長已獲指示為前線、從事高風險工作嘅人員，安排新一輪特定群組檢測。