47名民主派因「35+初選」被控串謀顛覆國家政權罪，目前仲有36人還押。民主黨尹兆堅公開畀太太同仔女嘅家書，講述還押生活片段，答應家人會保重身體，仲話還押期間要把握時間多做運動，利用囚室環境健身，每日朝早「行街」（即放風活動時間）嗰陣，做兩次15分鐘踏步運動，之後喺房入面用椅子借力抬腿，再做四組掌上壓，亦有做收腹運動，仲以牢房鐵閘嘅鐵枝做引體上升同拉背。佢話，效果唔錯，希望「肥尹變瘦尹」，就算瘦唔到，都要變「壯尹」。
黨友張文光、羅健熙今日（21日）去探尹兆堅，形容阿尹精神幾好，仲識講笑，處理緊周二（23日）上訴保釋案嘅文件，又提到認識到囚室內唔同國籍嘅囚友，佢哋為阿尹嘅保釋案禱告。
另外，還押中嘅劉頴匡，佢女朋友黃于喬（Emilia）喺facebook上載片段，片段係佢同一名屯門警署警員對話。警員噚晚（20日）致電劉頴匡，由Emilia接聽，警員問劉頴匡點解無去警署報到，Emilia就答佢劉頴匡去唔到，因為已經還押，警員仲追問劉頴匡因咩原因被還押。Emilia喺帖文話阿sir「好幽默」。