工聯會轄下首間「工聯專科醫療中心」今日(25日)投入服務,工聯會理事長兼工人醫療所董事會主席黃國同Emily講,中心以非牟利性質營運,等市民以較優惠嘅價錢睇專科醫生,會員更有「折上折」,舉例喺其他地方嘅診金要1000元,會員到中心就只需畀大約650元。中心設於旺角,工聯屬會及贊助會嘅會員診金有八折,家屬卡、長者卡持有人診金九折,藥費、化驗費等另計。
黃國話,中心有3間診症室,可以做簡單手術,已有超過10個專科醫生加入中心,提供包括外科、泌尿科、耳鼻喉科等約10項專科服務。黃國又話市民反應唔錯,開業首日已收到好多預約,泌尿科尤其受歡迎。黃國話去公立醫院睇專科往往要排長龍,但私家醫院診金又太貴,佢希望中心能夠填補中間嘅空缺。佢指出香港人口老化加劇,加上市民更關注健康,對優質專科服務嘅需求亦不斷提高,工聯會於是成立首間專科醫療中心。