回歸後第二任終審法院首席法官馬道立(Geoffrey Ma),今個星期五(8日)就last day退休,今日(5日)佢開最後一次記者會。不過Emily發現馬官身形似乎瘦咗唔少。佢任內10年,香港經歷咗唔少司法挑戰,唔通真係做CJ(Chief Justice)做到瘦晒?司法機構就回覆話,馬官身體狀況良好,多謝大家關心。1月6日報道:馬道立退休前法律儀式:法治是必要根基 涵蓋貫徹落實人權和基本自由
Emily睇返馬官舊年3月著西裝嘅相,同今日見記者嘅著西裝相,明顯今日套西裝係鬆咗好多。
下星期一(11日)法律年開啟典禮,會由接替馬官的終審法院常任法官張舉能主持,亦是張官第一日履新,而嗰日亦正正係馬官65歲生日,慶生同時又祝賀佢展開退休生活。佢今日喺記者會話,呢幾個月一直忙到連計劃退休生活嘅時間都冇,不過相信佢退咗休,一定會多咗時間捧佢至愛英超球隊曼聯嘅場。
Emily聽過唔少法庭行家會暱稱馬官做麥兜故事入面嘅黎根,法庭行家話覺得馬官由髮型同身形都好似黎根咁可愛,不過𠵱家馬官已經變咗「瘦版」黎根,唔知大家覺唔覺得似呢?