特首林鄭月娥噚日（25日）發表《施政報告》，佢今日（26日）再到立法會出席答問會，一開場就話政府以往有落實議員嘅建議，點名提及工業界吳永嘉、民建聯葛珮帆、經民聯張華峰等，實政圓桌田北辰發言時就好不滿，話希望林鄭月娥下次提下佢嗰名，話佢唔會害林鄭月娥。點知林鄭月娥回應，「其實你已經害咗我，你噚日話份報告係爭取連任，我係冇呢個意圖」。噚日田北辰見記者時話，呢份《施政報告》係林鄭月娥爭取連任嘅政綱，內容大篇幅感謝國家等。
今日田北辰發問時，講機場檢疫問題，點知講來講去都未入正題，最後立法會主席梁君彥提醒佢快啲問，仲話「呢個唔係你發表施政報告嘅場合」，引來哄堂大笑。
林健鋒：特首，你真係仲叻過超人
係呢個剩返主要係建制派議員嘅施政報告答問大會，唔少議員起身發言時都讚林鄭月娥嘅施政報告，經民聯林健鋒亦唔例外，話施政報告內容全面，佢同時提到商界關注同內地開關嘅時間，認為市民要配合政府嘅防疫工作，佢仲同林鄭月娥「真情告白」話：「特首，你真係仲叻過超人，有勇有謀又打得，我哋好支持你，但你一個人做唔做得哂呢？噚日你講到差唔多兩個鐘頭時，喉嚨都沙埋，有好多市民（傳）短訊畀我，好關心、支持你，仲話好惜你。」
施政報告專題：link.mingpao.com/66074.htm