即時港聞

Emily Online|陳肇始被批交代5000元確診津貼不清 林鄭月娥護航:佢太好人盡答記者問題 (13:15)

港府前日(22日)公布向本地新型冠狀病毒確診者派5000蚊津貼。食物及衛生局長陳肇始當日曾講述計劃,但冇提詳情,直至勞工及福利局長羅致光噚日(23日)喺記者會交代計劃框架。有意見批評陳肇始之前講5000蚊安排好唔清楚,令政府面對好多批評,要羅致光「補鑊」,陳肇始今日(24日)陪同特首林鄭月娥見記者時,被問到點睇呢啲批評,佢冇回應,反而係由林鄭月娥開口護航:「如果你話陳肇始要作出澄清呢,就係佢太好人,佢盡量答你哋啲問題」,又稱陳肇始未必完全掌握其他局砌緊嘅內容。

林鄭月娥話,翻查當日食衛局嘅新聞稿寫明「詳情稍後會由勞工及福利局公布」,佢話:「詳情都唔係喺食衛局,詳情係喺勞福局」,又話無論如何都冇偏離初心,係為咗幫助「手停口停」、出現經濟困難嘅基層。

陳肇始前日話5000蚊津貼係為咗「鼓勵市民檢測」,羅致光噚日澄清津貼目的「唔係鼓勵市民做(病毒)測試」,指出部分人抗拒檢測係擔心一旦確診需住院「手停口停」,所以提供津貼,減低市民接受檢測嘅障礙。

5000元津貼 相關報道:

5000確診津貼助基層 須聲明收入減 羅致光:減接受檢測障礙 周五起可申請

確診派錢5000 陳肇始:鼓勵檢測 不查資產 梁卓偉指扭曲原意應精準助人

相關字詞﹕林鄭月娥 陳肇始 羅致光 本地確診者派5000元 5000元津貼 編輯推介

上 / 下一篇新聞