即時港聞

Emily Online|清潔龍阿德提醒重陽拜山「帶走你的垃圾」 原唱衛蘭留言讚有創意 (19:40)

禮拜日(25日)就係重陽節,唔少孝子賢孫會去掃墓拜祭先人,食環署嘅清潔香港大使「清潔龍阿德」今日(23日)喺facebook出咗條片,將歌手衛蘭嘅新歌《帶走你的垃圾》改詞,提醒大家拜山要記得「帶走你的垃圾」,保持環境清潔。有網民讚阿德片中嘅歌聲似衛蘭,條片仲吸引到衛蘭「本尊」留言,大讚阿德「creative」(有創意)。

阿德改編嘅歌詞提到,「拜山的你帶備祭物,留低的卻變做廢物」,呼籲大家拜祭先人後記得「帶走燒肉,帶走你酒菜」。衛蘭原曲係有關情侶分手,阿德嘅新歌詞同樣唱到「分吧分吧」,不過係提醒市民喺新型冠狀病毒疫情下,同親戚「盡量分開先拜山吧」,減低病毒傳播風險。其實阿德喺帖文有叫大家「推到Janice Vidal衛蘭親自唱為止」,又回覆衛蘭嘅留言,問佢「可否斗膽叫你試唱一句」,但衛蘭本尊好似就暫時未唱喇。

另外,漁農自然護理署都提醒市民,重陽節到郊外掃墓時要謹慎處理火種,防止山火,包括應該喺化寶盆或鐵桶內燃燒香燭冥鏹,唔好用火燃燒野草,亦唔好遺下仲燃燒緊嘅祭品,離開墓地記得確保所有火種已經熄晒。漁護署仲話會喺重陽節期間,派員到郊野墓地巡視,如果發現有人違例喺郊區留低火種,會即時檢控。

清潔龍阿德版本《帶走你的垃圾》

相關字詞﹕重陽節 掃墓 拜山 清潔龍阿德 衛蘭 食環署 漁護署 編輯推介

上 / 下一篇新聞