即時港聞

Emily Online|張竹君自言唔係「感染控制專家」:掂口罩前後要洗手係普通常識 (19:00)

政府今日(11日)起再放寬社交距離措施,但仲未重開嘅酒吧業界前日(9日)就話,會要求顧客每飲完一啖酒就重新戴上口罩,希望可以復業,衛生防護中心傳染病處主任張竹君當日就喺疫情記者會回應,話經常除除戴戴口罩,比唔戴口罩更高危。

身兼行政會議成員嘅飲食界立法會議員張宇人聽完之後,噚日(10日)就上港台節目回應,批評有人「扮專家」,唔識計算風險。張宇人咁樣講完,就畀天文台前台長林超英話佢言詞囂張無禮,行為乖張,破壞行政會議嘅形象,仲以「前公務員」身分去信特首林鄭月娥要求撤去張宇人行會職務,同埋叫佢向官員及公務員道歉。張宇人之後重申,話喺電台節目到冇點名批評任何人,仲讚張竹君喺記者會做得好。

今日4點半疫情記者會上,即刻有記者問張竹君點回應張宇人話佢「扮專家」,張竹君就答自己喺感染控制方面唔係專家,隨即記者就問佢,會唔會收翻之前話喺酒吧入面除低口罩風險更高嘅言論,張竹君就話,「其實唔好掂口罩嘅外面,或者掂之後要洗手,掂之前要洗手呢,呢個係普通常識,我諗大家戴口罩都知道㗎啦。」

相關報道:張宇人不點名批張竹君「扮專家」 林超英函特首促撤其行會職

相關字詞﹕張竹君 張宇人 口罩 專家 編輯推介

上 / 下一篇新聞