政府噚日派員到立法會，幫議員採樣做新型冠狀病毒檢測，點知建制派影大合照宣傳計劃，經民聯梁美芬同民建聯黃定光（象哥）就因為企位問題鬧矛盾，象哥仲一手扯開美芬。梁美芬噚日剪輯事發時嘅片段，話事件絕對同爭位企無關，佢解釋自己當時因為著住窄身裙，唔方便踎低影相，仲話畀象哥「粗暴拉扯」感到震驚，請象哥多啲尊重女性。象哥回覆Emily話，條片大家都睇到，唔想回應畀人去炒作，覺得不值一提。至於會唔會道歉？象哥話，「因咩事要向佢道歉啫，我都唔明白」。
相關報道：【Emily】建制檢測合照 企位鬧小風波 美芬唔肯踎低 象哥一手扯開
梁美芬喺短片中話，自己昨日著住窄身裙，如果喺第一排踎低，好容易發生尷尬情况，「我唔知道後面啲男士係睇唔清楚呀，定係根本唔會考慮到呢一點」。梁美芬話當時象哥「嗌晒全名，要求我踎低」，最後仲用手扯開自己，佢認為「大家喺過程中少咗信任、尊重、了解同溝通」。梁美芬最後同無乜機會著裙嘅男士講，「女性有時有啲嘢未必做到，唔喺唔想，而係唔適合或唔方便」，希望同類型嘅事唔會再發生。