教育局長楊潤雄嘅香港「沒有三權分立」言論惹起爭議,但無影響佢今朝(9月1日)出席小學開學活動心情。學校暫時只可以喺網上舉行開學活動,楊潤雄喺政府總部「出席」九龍灣佛教慈敬學校開學活動,仲同一班六年級學生以Zoom對談。有男生向楊潤雄「挑機」,話暑假期間雖然成日困喺屋企,但堅持每日跳繩300下,反問楊潤雄有無好似佢咁做運動。楊潤雄聽到學生咁講,當堂「嘩」一聲,話自己無對方咁勁,但都有喺屋企做下伸展,間中踩下單車機keep fit。
另一男生溫俊祥就問楊潤雄認唔認得佢,原來喺2018年一項STEM展覽,楊潤雄參觀過學校嘅攤位,當時溫俊祥介紹佢哋嘅「智能灑水器」發明。溫俊祥𠵱家大個仔咗,依然愛創作,早排參加咗一項用廢紙砌骨牌比賽。
楊潤雄就話,目前大家仍然要網上上堂,但要保持積極樂觀心態,到9月尾大家應該可以返學見面,希望大家好好珍惜同教師同埋同學相處嘅時間。佢喺開學禮上致辭嗰陣,勉勵大家逆境自強,話「任何疫情總有消退嘅一日,屆時我哋一定可以再次強勢回歸學校」。