港大感染及傳染病中心總監何栢良今年初開始，幾乎每日都喺商台節目《在晴朗的一天出發》就新型冠狀病毒疫情受訪。佢噚日（26日）向商台表示要暫別節目，話因為「工作及家務比較忙」，面對疫情仲寄語「市民要平心靜氣，用科學原則去應對，疫境自強」。唔少網民留言表示不捨，「感謝您過去大半年百忙之中都抽出十分鐘時間，分享專業分析」。
《晴朗》今日（27日）喺facebook話，何栢良噚日發短訊通知「近日工作及家務比較忙，所以每天10分鐘的何栢良環節，要同大家暫別。感謝商台年初至今比機會我，同聽眾分享疫情資訊，自己亦獲益良多」，他又寄語「面對疫境，市民大眾要平心靜氣，用『科學』原則去應對，疫境自強」。
他噚日亦喺facebook貼文，話「今天放假處理家務」，仲hashtag「#多謝大家」。
《晴朗》主持人仲話，何栢良從來無講過有任何壓力，亦分享同何栢良嘅合作，提到何醫生以往無論幾忙都會抽空同主持人談疫情，而且準備充足，希望同市民分享防疫資訊。