唔少人會趁書展出新書，明報出版社今年其中一本新書叫做《香港顏色密碼》，一眾作者包括作家屈穎妍、前新聞統籌專員馮煒光、香港專業人士協會會長陳建強等，而其中一名作者係資深傳媒人「施嘉雯」。Emily有個前同事同樣叫施嘉雯，喺《明報》做咗17年，但佢話唔係呢本書嘅作者，仲呼冤係「被作者」。原來，嗰位作者「施嘉雯」係「化名」，而國際關係學者沈旭暉都喺facebook講述事件，替真．施嘉雯不值，引嚟網民討論。
《香港顏色密碼》一書由《亞洲週刊》、零傳媒同明報出版社出版。真．施嘉雯喺facebook話，得知今年無端端成為一本政治書作者之後，就搵咗負責編輯江迅（《亞洲週刊》副總編輯）了解，獲江迅回覆並承認有嗰資深傳媒人寫咗訪問但唔想出真名，所以化名「施嘉雯」，而出版界唔會要求用化名嘅人註明係用化名，仲話宮雪花都用咗「江迅」筆名出書，所以佢好同情施嘉雯嘅遭遇，但無能為力。
真．施嘉雯喺facebook話對事件感無奈，又質疑點解真正執筆者要用化名，仲要用上一個喺明報政治版工作多年嘅人名，直言「其目的可謂顯而易見，其心可誅，不知所謂。」