政府喺4月大換班，財經事務及庫務局長由劉怡翔換上許正宇，而局長嘅政治助理、會考「10A狀元」楊寶蓮無幾耐就宣布辭職，離開政府。前任行政長官及政治委任官員離職後工作諮詢委員會今日（24日）公布楊寶蓮嘅新動向，佢下周一（27日）會出任亞洲企業領袖協會嘅項目總監。委員會認為，楊寶蓮離職後擬擔任嘅工作唔會構成任何潛在嘅利益衝突。
楊寶蓮最為人熟悉為佢喺2003年嘅會考「10A狀元」，加入政府前喺多家金融機構任職研究工作。而佢未正式遞信辭任政助，4月就已經喺自己facebook事先張揚會離職，5月26日正式離開政府。
亞洲企業領袖協會工作包括舉行論壇，研究能源、環境、公司管理和創新政策等議題，希望提高亞洲地區經濟增長同競爭力。
其他報道：元朗亞玉冰室老闆再度遇襲 警拘4人涉傷人疑與債務問題有關