【23:12更新】代表反修例運動嘅香港民主女神像噚晚(16日)「現身」荃灣愉景新城嘅童裝店Chickeeduck。兩米高嘅雕像吸引咗唔少人嚟打卡,不過網上就流傳一張由愉景新城商業服務有限公司發出嘅信,要求舖頭移除雕像。Chickeeduck行政總裁周小龍向Emily證實收到呢封信,雙方交涉緊。
Emily今日(17日)下午5點幾去到商場,雖然人流唔多,但Chickeeduck舖頭前就零零舍舍有十幾人圍觀,店內都有唔少家長陪小朋友揀緊衫。另外,舖頭入面擺咗講民主同自由嘅繪本,仲有連儂牆㖭。
周小龍話擺女神像出嚟都係搞吓生意噱頭,同時想教育小朋友咩係民主;「(女神像)代表民主咁正面,佢又唔係拎刀拎槍,又幫商場帶旺人流,商場竟然叫我搬走,係咪好荒謬?」佢話見到小朋友同女神像合照,連儂牆上面用小朋友寫嘅「Free Hong Kong」,都令佢好感動。
田北辰:周小龍反修例運動後藍變黃
周小龍同實政圓桌立法會議員田北辰一樣,係拔萃男書院舊生。田二少話,周小龍以前喺大陸有生意,當時政治立場係「藍」,所以坊間有人懷疑佢「扮黃」。但田二少覺得,反修例運動後周小龍態度明顯轉變,成日喺舊生通訊群組發表較激烈言論,結果同一啲男拔校友鬧翻,仲退出群組。田二少話從周小龍嘅行為,相信佢係真「黃」,仲話佢放棄咗內地嘅生意。