反修例風波至今即將一年，民間團體「Lady Liberty HK 香港民主女神」聽日（21日）開始至6月7號，會喺深水埗大南街Openground舉行「香港民主女神我哋重未＿展覽」，以藝術創作表達對呢一年社會事件嘅態度。Emily今晚（20日）去咗睇預展，印象最深刻嘅展品，係一個民主女神半身像，足足有成層樓咁高。
Emily同今次展覽發言人Flash傾過，佢話團隊舊年喺獅子山豎立香港民主女神像都有4米高，但之後畀人破壞；團隊今次用咗超過一個月重新整一個5米嘅女神像，原本計劃分兩層樓展出，但因為展出前有食環署人員入場地了解，場主擔心受到打壓，而展覽團隊都唔想為場主帶嚟麻煩，所以決定唔分兩層樓展出，只係展出女神像嘅上半身，下半身就要第日再搵機會展出。
今次展出嘅女神像同原版都有唔同，原版女神係一手拎旗、一手拎雨傘，而今次展出嘅女神像就一手頂住天花板，一手撐住地下，Flash話係象徵目前港人受打壓嘅情況。