終審法院首席法官馬道立今日（7日）宣布，委任大律師張天任做資深大律師，係本年度唯一一位，任命會喺5月15日生效。不過，司法機構就話由於公共衛生考慮，委任儀式細節會另行公布，係首次無同時公布儀式日期。
42歲張天任喺香港土生土長，讀完香港大學法學士課程，再喺英國倫敦國王學院攞埋個法律碩士學位，2001年喺香港正式執業做大律師，擅長處理商業糾紛、司法覆核、稅務等領域嘅訴訟，依家係知名大律師辦事處Temple Chambers嘅成員。
翻查資料，近期多單由反修例風波引發嘅民事訴訟，例如律政司同警方申請臨時禁制令阻止「起底」、禁止滋擾港鐵同機場等命令嘅申請，都係由佢代表政府打官司。另外，喺港鐵沙中線紅磡站調查委員會聆訊嗰陣，仲代表埋總承建商禮頓。