新民黨黨內初選今日（12日）截止報名，吸引到自由黨李梓敬報名出選新界東，挑戰現任新界東立法會議員容海恩。自由黨已表明，如果李梓敬要參加其他政黨嘅初選，唔該佢先退黨。李梓敬今晚就公告，「今日下晝，做咗一個非常艱難嘅決定，就係退出自由黨」。
李梓敬喺2016年有自由黨榮譽主席田北俊幫手抬轎，曾出選新界東立法會選舉但落敗。佢今晚話，「好感激自由黨領導多年來，對我嘅悉心栽培。今次退黨嘅決定，確係萬般不捨」，又話對自由黨只有感激之情。田北俊對於李梓敬嘅舉措，就話「I don't care」。
新民黨主席葉劉淑儀強調，初選機制唔係為李梓敬度身訂做，亦唔係瞄準自由黨。新民黨初選以新界東嘅競爭較激烈，該黨新界東立法會議員容海恩已報名黨內初選，除咗李梓敬跨黨挑戰，仲有兩個公民力量成員，包括發言人林宇星同廣西南寧市政協委員、社區主任陳志豪亦有報名，容海恩可以話係面對相當大嘅競爭。