早前確診嘅馬主周巧兒噚日（8日）已康復出院，同周巧兒同枱飲宴而被列為密切接觸者嘅「幫港出聲」發起人周融，已經完成檢疫，離開翠雅山房檢疫中心。周融話，檢疫期間「無所事事」，靠睇書同做運動度日，佢透露睇緊一本關於無政府狀態嘅書，Emily好奇問有咩得着，佢就話本書太長太悶未睇完喎。
周巧兒嘅寵物松鼠狗成為全球首宗狗隻確診感染新型冠狀病毒個案，引起全城關注，周巧兒群組至今共有5人確診，包括佢胞兄周秉亮、兄嫂、兩名家傭。周融上周六（7日）檢疫期屆滿，佢話離開翠雅山房前已經驗左唾液樣本，證實對病毒呈陰性可以離開；其他親屬都未有感染情況，都已經完成檢疫。
周融之前同Emily講，無怪責任何人，平時香港人都好忙，檢疫期間可趁機「偷得浮生兩周閒」。佢噚日就話，檢疫真係好悶，佢又話，即使重獲自由都唔會周圍去，盡量留喺屋企。
新冠肺炎 相關報道：
相關字詞﹕抗疫新階段 新冠肺炎 新冠病毒 新型冠狀病毒肺炎COVID-19 新型冠狀病毒肺炎 新型冠狀病毒疫情 新型冠狀病毒香港 2019冠狀病毒病 周融 檢疫 編輯推介