新型冠狀病毒疫情持續，本港早前出現「口罩荒」，市民見網上有代購就紛紛留言「2盒，thx」，令呢句成為流行用語。上月20日有警員確診感染，更有網民話「3萬（警員人數），thx」，可見警民關係自反修例風波以嚟一直僵持。
警方今朝喺facebook出post，話開專頁4年來，累積like數已有30萬，「多謝大家支持和鼓勵」，又話希望大家透過轉載分享警察信息，令知道真確資訊嘅人遠超30萬，達至「300萬，thx！」甚至「3000萬，thx！」。
不過，警方出post後隨即有網民呼籲大家「unlike」，令讚好人數急劇下跌，5個鐘內已跌至約29萬。事實上，警方專頁嘅追蹤人數有逾40萬，相信玩開facebook嘅人都應該知道「追蹤」同「like」嘅分別。截至今日下午5時15分，警方facebook讚好人數跌至289,620，而追蹤人數有406,236。
其他報道：999赴援98%達標 警未答計7．21否 倘計當晚2.4萬報案 比率減20百分點