即時港聞

【Emily Online】葉劉幫襯黃店問有否做選民登記 稱不理顏色只要非支持暴力 (18:25)

反修例風暴後,香港出現「黃色經濟圈」。食肆Top Blade Steak Lab喺facebook話,今日(22日)「馳名中外嘅Regina葉劉姐姐(新民黨主席葉劉淑儀)」去咗佢哋銅鑼灣店幫襯,又殺入廚房搵佢哋老闆問有冇登記做選民。該店引述葉太稱「係幫個同事手」,因為啲同事驚黃色經濟,之後仲要搵佢哋個商業登記證影相。葉太同Emily講,佢去幫襯餐廳唔會理顏色,只要唔係支持暴力就得。至於去呢間舖都係對佢哋嘅菜式有興趣,不過之後唔會再去幫襯,嬲嬲豬咁話因為呢間舖頭「抽佢水」。

呢間食肆喺facebook上載閉路電視截圖證明葉太真係有去幫襯,形容葉太喺老闆口中知道呢間係「黃色小店」後「打個突」,之後急急腳走人。而舖頭為咗紀念葉太對黃色經濟圈嘅支持,決定將佢買外賣嘅現金化為愛心,全數捐比網媒「立場新聞」。

葉太同Emily講,佢今日去呢間舖頭買咗個牛油果漢堡包外賣,順便了解下有幾多食肆做咗選民登記,但唔係新民黨做緊咩研究項目,只係自己「得閒做下survey」,影佢哋個商業登記證都係做個紀錄。佢話,舖頭員工好好招呼,當對方同佢講係「黃店」後,佢都有話想了解黃色代表咩。對於呢間舖將佢買外賣嘅94元捐畀「立場新聞」,葉太話係餐廳嘅事,佢自己唔支持「立場新聞」。

逃犯條例 相關報道:

涉以揚聲器襲警 區諾軒被指於警「捱更抵夜」時提無理要求

餐廳股東控襲警妨礙司法 准50萬元保釋

獨眼教師入稟向警索償 促頒令警行為屬違法

畢架山現「追究暴警」直幡

7‧21傷者告一哥索償 冀逼警交代 患創傷後遺 目擊者:返屋企有錯咩

元朗紀念襲擊半周年 失明律師中椒倒地

相關字詞﹕逃犯條例 反修例 黃色經濟圈 黃店 葉劉淑儀 選民登記 編輯推介

上 / 下一篇新聞