即時港聞

【Emily Online】田北俊撐「光復」香港高度自治 望駱惠寧帶中聯辦走一國兩制正路 (16:15)

年輕人近月成日喺街上叫「光復香港」口號,被建制派質疑有港獨含意,但作為建制派嘅自由黨榮譽主席田北俊(田少),今午(16日)都高調話撐「光復」。田少話嘅「光復」,其實係講香港1997年回歸時嘅一國兩制、高度自治,佢話當年香港真係有更多自由,就算去參選,都唔會畀人DQ取消資格;但近年一國兩制「走樣變形」,田少話喺王志民任職中聯辦年代,對香港事務樣樣管,指揮建制派。佢寄望新上場嘅中聯辦主任駱惠寧,可以帶領中聯辦走返一國兩制正路。

田少同公民黨前主席余若薇、公共事務顧問盧子健,擔任網媒《眾新聞》搞嘅午餐會嘉賓。田少話,區議會改選後民主派大勝,喺選委中多咗100多票,評估特首林鄭月娥下台再補選嘅機會細,因為如果搞補選,1200張選委票之中,候選人唔好話想攞777票,連爭取689票都艱難,試問咁仲有邊個想出嚟選。所以佢認為,有機會由林鄭月娥繼續留任直至2022年,自己去收拾呢個爛攤子。

盧子健就話,去年11月區選投票率逾七成,預料9月立法會投票率都會好高。對於林鄭月娥日前推出100億元民生政策,盧子健笑言同意可用「慳啲」來回應。佢話自己已「登六」,夠60歲資格可以2元搭車,「可以慳啲」,但市民唔會因為2元,就會無事發生,佢自己仍然會投票畀反對政府的候選人。佢又比喻,依家就如有人搞出家暴後,然後就叫大家做一家人,但最大問題係第日又再打過喎!

身為資深大狀嘅余若薇就大談法治,話今年應該有好多示威者上法庭,或者有啲判決大家可能覺得嘩然、不滿,大家對判決可以提出批評、表達意見,但呼籲要有節有理,唔好人身攻擊司法人員或者破壞。佢呼籲大家有耐性,因為唔同意案件,都仲有機會可以上訴。

其他報道:鄧炳強赴中西區區議會 主席要求警員戴委任證 一便衣拒絕後離場【多圖】

其他報道:地盤工認北角襲記者 官索感化及社會服務令報告2月判刑

相關字詞﹕田北俊 田少 自由黨 建制派 光復香港 一國兩制 高度自治 中聯辦 王志民 駱惠寧 余若薇 盧子健 眾新聞 林鄭月娥 區議會選舉 立法會議舉 選委 法治 編輯推介

上 / 下一篇新聞