逃犯條例

即時港聞

下一篇
上一篇

【Emily Online】建制派中大校友為衝突表難過 梁美芬拒與學生對話 陳克勤促讓出二號橋

警察同示威者、學生近日喺香港中文大學「二號橋」衝突,校園多處烽煙四起。身為中大校友嘅民主派立法會議員區諾軒、林卓廷等周二(12日)返咗中大支援。Emily問過幾個喺建制陣營嘅中大校友點睇,經民聯梁美芬、民建聯陳克勤都話難過,前者認為學生行錯路,後者話政府要攞出辦法令衝突停止,好過淨係將責任交畀校長。工聯會麥美娟就話,佢喺中大度過咗人生最開心嘅4年,同樣好愛學生、校園,又話既然係愛中大,就唔好畀「暴徒」走入去、利用呢個地方破壞;愛同學就應該勸佢哋同非法行為割席。

梁美芬做過中大聯合書院學生會嘅會長,佢話明白中大好多學生一直都係走到社會前線、倡議社會政治改革,又話自己做學生會嗰陣都好激,但唔會用暴力去解決問題、對付政見唔同嘅人。佢呼籲師弟妹,唔應該做傷害、毁滅整個社會嘅行為,反問「毁滅法治,何來改革」;以仇恨主導會令運動失去光環,得唔到市民認可。曾經同前線勇武派對話嘅佢話,唔會返去同中大學生傾偈,因為現時唔係可以傾偈嘅氣氛。佢又勸年輕人,仲有好多前途,如果從政嘅路想愈行愈闊,就唔好泥足深陷。

同梁美芬一樣讀政治與行政學系嘅陳克勤話,現時大學入面好多設施被破壞,先唔好講警民衝突,佢都唔想見到咁多同學仔受傷。佢希望政府攞出辦法令衝突停止,好過淨係將責任交畀校長,校長淨係做斡旋工作,而問題未必係校長可以處理到。佢希望同學能夠將二號橋位置讓返出來,畀警察或消防清理下面公路嘅路障,令新界東嘅交通搞番掂。佢話,通訊群組內一班同學見到學校被火燒都好唔開心。

喺中大修讀英文系嘅麥美娟話,法庭都話二號橋該處唔係校園範圍,佢喺中大4年都好少行過去,只係影畢業相去過。佢認為,今次事件,警方應該依法執法,確保市民有安全、暢通嘅路。佢又話,社會上有好多人話愛惜同關顧同學,愛同學應該勸佢哋同非法行為割席,唔好參加;大家都唔想同學出事,學校應該清楚話畀學生聽,免影響前途。佢對於社會上仍有人包庇呢類行為,認為不能接受。

麥美娟係區議會選舉葵青區偉盈選區候選人,佢嘅對手係冼豪輝。

其他報道:城大取消畢業禮嶺大延期 港大理大本學期餘下課堂改網上進行

其他報道:警務處長委任百名懲教人員作「特別任務警察」

相關字詞﹕逃犯條例 反修例 遊行 示威 集會 五大訴求 警民衝突 警察 中文大學 中大 建制派 梁美芬 陳克勤 麥美娟 編輯推介

上 / 下一篇新聞