逃犯條例

即時港聞

下一篇
上一篇

【Emily Online】催淚煙瀰漫社區人獸遭殃 龜抓眼貓流淚

噚日全港好多區都有放催淚彈,受影響唔只居民,仲有一眾小動物。有黃大仙居民同Emily講,住喺18樓都聞到催淚彈,連隻水龜都用爪撥眼,係養咗幾年第一次見。深水埗嘅獸醫院,更要將啲貓「大遷移」到深切治療病房。

相關報道:警昨放800催淚彈160海綿橡膠彈拘148人 記者讀聲明譴責警察濫

住喺黃大仙下邨、21歲嘅LLY(化名)話,噚日下晝喺18樓走廊旁觀示威集會,樓下放緊催淚彈嘅時候,雖然無煙飄上嚟,但塊面好痛,仲流眼水;同一時間,佢見到屋企隻水龜用爪撥眼,「養咗幾年第一次見佢咁樣」。雖然LLY將隻龜擺番落水缸就無事,不過佢話好嬲,唔明點解警察要喺民居附近放催淚彈,「搞到人唔緊要,𠵱家搞埋我隻龜!」

另外,警察噚晚喺深水埗警署外施放催淚彈驅散示威者,同深水埗警署相距百幾米嘅城大動物醫療中心都有動物受影響。有醫療中心職員Ryan(化名)就話,前晚警察發射催淚彈之後,職員喺對正茘枝角道嘅貓病房聞到刺鼻嘅氣味,於是要急急幫啲貓「大遷移」去深切治療病房。Ryan話,見到啲貓明顯受驚同好緊張,除咗匿埋喺沙盆,仲喺貓籠度匿埋喺毛巾底,呼吸急促。

Ryan唔明點解警察決定用催淚彈前,唔通知附近嘅動物醫療中心一聲,畀職員起碼可以閂好門窗同埋拎啲濕毛巾攝門罅,「𠵱家警察唔通知就射催淚彈,係罔顧動物生死」。Ryan仲話見到民間發起11號深水埗遊行,佢唔知到時警察會點處理,啲動物唔知會唔會又受影響,覺得好不安。

網民Matthew Ho係facebook「天下貓貓一樣貓」群組上載咗張相,相入面佢隻貓「忌廉」眯起雙眼,眼角有滴淚,話係催淚彈谷上嚟搞到咁,而個帖文就標記咗係深水埗。Matthew後來更新,話煙散咗之後「主子好多了」,仲希望「街上浪浪(流浪動物)平安」咁話。

其他報道:公屋輪候時間微跌至5.4年

其他報道:瑪麗制定應變措施 重建若再現炸彈將疏散病人

其他報道︰涉串謀詐騙工資 物流署職員與外判清潔工認罪

相關字詞﹕逃犯條例 八五罷工 衝突 催淚彈 寵物 城大動物醫療中心 編輯推介

上 / 下一篇新聞