經濟

【財經花生】李斯特城之謎... (18:24)

今日財爺曾俊華出席《明報》主辦的經濟論壇時,主持人問佢如果要揀一隊球隊嚟比喻香港,會揀邊一隊,財爺嘅答案出乎大家意料:「希望係Leicester(李斯特城)」,當主持人要求佢解釋一下嘅時候,一向健談嘅財爺竟然大賣關子,只係答:「大家做啲研究」。筆者就喺到發揮想像力,睇下可唔可以參透到箇中玄機。

眾所周知,李斯特城係今季球壇上面嘅一顆明珠、一個驚喜。事關李斯特城並唔係類似於巴塞、皇馬呢啲嘅傳統班霸,而係一個喺英格蘭低級賽事到浮浮游游嘅球隊,2013/14球季先升上英超,不過上季又再陷入降級邊緣,好彩最後力保不失,成功護級。所以今季開季前,冇人預計得到,李斯特城可以差唔多由頭帶到尾,先後擊敗傳統勁旅例如曼城、利物浦等等,只差最後7場賽事,就可以奪得球隊史上首個英超冠軍,絕對係一支「神奇球隊」。

財爺以李斯特城比喻香港,唔難估計係希望香港嘅前途一片光明,成為一個「神奇城市」。不過,值得留意嘅係,李斯特城今季同上季有一個不同嘅地方,就係領隊嘅改變。一個球隊要有出色嘅表現,領隊絕對有決定性作用,同樣地一個城市要人人安居樂業,經濟發展蓬勃,同最高領導人嘅表現亦都係不可分割。

喺臨近2017特首選舉呢個敏感時刻,當大部分人認為梁振英表現慘不忍睹時,一直都唔願表態會唔會參選特首嘅財爺,冇理由唔知道佢嘅言論係受到大眾注視,但佢依然拒絕解畫,留低一個空間比大家幻想,言談間更無確實話香港似李斯特城,而係話「希望係」,比人一種「而家仲未係」嘅感覺,種種蛛絲馬跡,都可能暗示左財爺或會參選下屆特首,為香港帶嚟改變。

不過,李斯特城仲有另外一樣值得香港學習嘅特色,就係球會、領隊教練、球員同埋球迷都上下一心嘅精神。要知道「團結就是力量」,或者財爺係希望藉此寄語港人,要化解分歧,團結一致,先可以好似李斯特城咁,成為一顆耀眼嘅明珠。

當然,頭盔要帶定—究竟財爺答案背後嘅真正原因係咩,當中又有乜含意,相信只有財爺自己先最清楚啦。

撰文:徐寶文

●體驗全新「明報財經網

Like「明報財經 mpfinance」fb專頁!

相關字詞﹕編輯推介

上 / 下一篇新聞