經濟

【財經花生】出得黎行 美國不如早啲還! (18:53)

美聯儲今次唔加息係意料中事,令人意外嘅係「全球經濟及金融狀況」竟成為原因之一,畢竟美國從來都係不管他人瓦上霜,突然「世界警察」上身,加息都要顧慮其他國家情況,令人百思不得其解。

美國嘅地位一向「超然」,莫講話貨幣政策,金融領域上任何發展,都唔理會其他國家情況。當年將房貸包裝成證券轉售歐洲投資者,美國仍然話「風險可控」;2013年啟動退市,又可嘗顧慮到會令亞洲市場大動盪?

有經濟師坦言,今次議息結果嘅意義,在於美聯儲改變一貫作風,由於全球經濟一體化,可能以後聯儲局加息幾多都要睇人民幣嘅走勢。有經濟師更笑說,如果要「等埋中國」,美國今年底都加唔到息,畢竟大家多年來預言嘅中國經濟「硬着陸」,啱啱先開始發生,中國同新興市場恐怕有排捱。

所以,耶倫噚晚所講嘅任何原因,都難以解釋點解唔加息。有經濟師直斥,耶倫講嘢唔清唔楚,令市場訊息混亂,每一次延後加息,都減低咗聯儲局嘅公信力。

如果美國真係要做「世界警察」,應該帶頭將利率正常化,多年以嚟各國QE令資產出現泡沫,到頭來都係要跌。出得嚟行,預咗要還,不如早啲還!

廖毅然

上 / 下一篇新聞