經濟

【財經花生】習主席訪美 雙馬同行 (18:36)

習近平下星期首次以國家主席身份訪美,隨團會有邊位商界名人,美國方面又派邊班企業巨頭接待?今日美國方面就透露結果,習主席下星期三將會帶住15個中國企業家,響西雅圖同15位美國企業家舉行座談會。

一如所料,既然中國要大搞「互聯網+」,3位IT猛人阿里巴巴馬雲、騰訊(0700)馬化騰同百度李彥宏當然響名單之內;而中行田國立、工行姜建清兩名內銀大佬亦肯定現身;而雙匯就因為買了美國Smithfield呢間全球最大豬肉商,所以董事長萬隆亦都獲邀,雖然萬老家鄉口音頗重,不過同美國人打開交道,溝通應該不成問題嘅。

美國方面,巴郡主席巴菲特一定走唔甩,蘋果行政總裁Tim Cook亦都會出現,相信佢最關心係 iphone 6S plus 響中國賣得好唔好;另外IBM、Microsoft、亞馬遜CEO都響名單之中,反而令人意外係,Facebook嘅朱克伯格竟然冇響名單度,唔通佢仲嬲緊中國唔俾FB登陸?

部份企業家配對可以令人產生生意上遐想,你話伊利同星巴克嘅老細坐埋一齊有咩好傾?肯定係咖啡加咩奶啦。但考考大家,隨團有位中國企業家萬向集團主席魯冠球,佢同美國又有咩關係?

答案係,萬向係中國首間引進美國通用汽車零件嘅廠商,同時,亦係投資美國地產市場最大嘅中國企業,估計手上起碼擁有超過60個地產項目。

不過咁,呢30位企業家見面傾乜唔重要,唔駛理邊個買奶或者邊個賣肉,抑或蘋果同聯想合作出手機,最重要係傾完之後會唔會對外宣布做成幾多千萬億生意,咁就中美互相推動經濟,大家樂見。

陳子凌

上 / 下一篇新聞