「第六屆中學校際高爾夫球比賽」今日（23日）喺粉嶺舊球場上演，患有「先天手差異」、去年曾於日本殘疾人公開錦標賽（臂障組）奪冠嘅12歲小球手馬皓軒今年首度參賽，就奪得丙組男子個人賽淨桿亞軍。
馬皓軒話，今次係佢第一次喺粉嶺高球場「舊場」打波，天氣酷熱，打到半場時佢都覺得攰，不過滿意最終成績，佢透露今日係佢首次打出200碼距離，打破咗之前180碼嘅紀錄，又話六月將會去日本比賽。佢亦提及，初初打波時唔識得揮桿，喺教練嘅指導下先搵到最合適嘅揮桿方法，至今每個禮拜都至少用三個鐘練習高球。
香港高球會Instagram今日（23日）就上載影片，展示患有腦性麻痹嘅殘疾高球名將普珀特（Kipp Popert）訪問並教導馬皓軒嘅過程，馬皓軒話自己嘅目標係「世一」，普珀特就係影片中話，遇到一個擁有一樣夢想嘅年輕人，鼓勵佢尋找機會，同其他非殘疾人士比賽，相信雖然困難，但可以帶來進步。普珀特笑稱，相信馬皓軒可以克服，因為佢經歷過比高球更難嘅事情。