5間的士車隊今日 （3日）喺運輸署青衣車輛檢驗綜合大樓舉行啟動禮，各間車隊喺大樓天台列隊「曬冷」旗下的士車型，不過啟動禮開始前發生咗段小插曲，或者因為今早陽光太猛烈，「的士大王」伍熀兒子、泰和車行董事總經理伍海山喺接受傳媒訪問時疑因中暑突然暈倒，一度跪倒在地上需人攙扶。最後伍海山需留喺大樓內休息，全程未有再現身啟動禮，要由細佬伍冠山代替在台上介紹車隊。
啟動禮定於今日上午11時半舉行。各間傳媒到場後趁住啟動禮未正式開始前同伍海山做訪問，請佢介紹車隊。Emily見到伍海山接受訪問時已經塊面紅晒兼大汗耷細汗，做完訪問大家請伍海山同的士合影，影咗幾分鐘後，伍海山突然要用手撐住的士車頭，各位行家一開始以為伍海山只係企唔穩，點知伍海山其後向後暈低，行家們同車隊員工隨即一擁而上嘗試扶返伍海山起身，再合力將伍海山搬上輪椅。