律政司長林定國同太太今早（22日）去咗善導會舉辦嘅「甦Walk•同你心 同你行」2025慈善步行嘉年華，活動目的係籌集資金，支持預防犯罪及更生服務。林定國喺facebook話，今次係舊同學兼老友、善導會執行委員會主席潘兆童法官邀請佢出席，活動有超過700人參加，當中包括更生人士同屋企人。
林定國大讚活動名改得好，話「甦」係「更生」，「甦Walk」嘅諧音係「so what」，意味即使遇到挫折都無咩大不了，「同你心」嘅同音詞就係「同理心」。
佢形容人生就好似一場步行活動，但必須揀自己嘅路線、決定自己嘅步伐，亦唔知自己走幾遠、幾耐，更甚可能會迷路、行錯路，甚至跌倒，最終必須靠自己努力爬起身，重新搵正確嘅路徑。而佢覺得，當大家感到徬徨迷惘、彷彿無力氣重新上路時，最需要及最期望就係附近有人能扶一把、講啲體己話、指點一下迷津、陪走一段路，重拾信心和鬥志、遺忘，認為咁就係「同心同行」嘅真諦。