政務司長陳國基噚晚年初三（1月31日）邀請20位立法會議員到大圍美林邨一間酒樓食「開年飯」，一齊展示支持本地消費，又話政府會雙管齊下，一方面鼓勵市民支持本地經濟、多留港消費，並要吸引旅客來港。
陳國基話，噚晚未到7點，酒樓已經座無虛席，又話酒樓嘅套餐亦非常「高性價比」，議員們都話非常超值。
同一班議員聚餐，點會只係食飯，陳國基席間都聽咗議員「獻計仔」，邀請佢到不同地區品嚐當區美食，並鼓勵市民發掘香港好去處。
另外，陳國基引述酒店同餐飲業反映，今年農曆新年市面興旺，除本地市民，訪港旅客亦錄得唔錯升幅。由大除夕至年初三，入境旅客共錄得約67.7萬人次，較去年同期上升6.2%。內地旅客約為56.4萬人次，較去年同期上升4.3%；非內地旅客就約有11.4萬人次，較去年同期上升16.7%。
陳國基話，政府會一方面鼓勵市民支持本地經濟，另一方面做好各項接待旅客的舉措，吸引更多內地和國際旅客來港旅遊，促進本地經濟。