即時港聞

Emily Online|入境處將軍澳總部設澳門自助過關服務登記站 (15:32)

唔少人長假期都會到去澳門旅行,入境處話,上個月搬遷到將軍澳嘅入境處總部,設澳門自助過關服務登記站,合資格嘅本港居民只要帶備身分證,就可辦理登記手續,登記完成最快3個鐘可使用,日後去澳門旅行就可以使用身分證進入自助過關系統,並以指紋核實身份,便能更方便快捷辦理出入境手續。

入境處喺社交平台Instagram上載短片,片中嘅主持人去到入境處新總部,實測位於1樓嘅澳門自助過關服務登記站,只需要掃瞄身分證,選擇同意登記,再按指示登記指紋,話1分鐘都唔洗就完成登記。如有需要,在場亦有處方職員協助。

入境處話,持有香港永久性居民身分證者,或其身份證附有「*」、「***」或「R」標記嘅合資格本港居民,就可憑身份證使用澳門自助過關系統服務;而持本港簽證身份書嘅本港非永久性居民,亦可憑其簽證身份書使用相關服務。

除將軍澳總部外,合資格者亦可喺港珠澳大橋香港口岸、港澳客輪碼頭、中國客運碼頭、啟德郵輪碼頭、各人事登記辦事處,及澳門北安出入境事務大樓和各主要口岸辦理手續。11至17歲嘅合資格本港居民,則須喺其家長或監護人陪同下,連同出生證明書正本、及家長或監護人嘅身份證,前往澳門邊境站登記。

相關字詞﹕

上 / 下一篇新聞