即時港聞

Emily Online ︳《九龍城寨之圍城》熱播 城寨原址附近「龍津石橋」遺跡 明年第二季完成保育工程 (23:29)

近日熱播嘅電影《九龍城寨之圍城》令九龍城寨歷史再次掀起熱話,雖然九龍城寨已經被拆多年,不過其實香港仲保留緊一啲同城寨有關嘅遺跡,2008年土拓署為「啟德發展計劃」進行考古勘探,就喺城寨原址附近發現到「龍津石橋」,呢條橋相傳係昔日清朝官員由水路進入城寨嘅必經之路。政府其後喺2021年展開保育工程,將遺跡原址打造成保育長廊。至於長廊幾時完工可以參觀,Emily問過建築署,署方話原址進行緊結構同挖掘工程, 預期會按原定目標喺4年內,即係2025年第二季竣工,工程亦暫時未見有超支情況。

龍津石橋同城寨嘅深厚淵源始於清朝年代,原長約200米嘅石橋喺1873至1875年間建成,除咗喺當時九龍城區的登岸碼頭,亦都係朝廷向往來船隻徵收關稅嘅基地,當時碼頭附近有一個墟市,貨物大多都喺碼頭上岸。可惜其後喺二次大戰日佔期間,石橋連同當時嘅九龍城碼頭喺1942年被淹埋,直至2008年先土拓署喺考古工程中發掘到部分橋面,呢條象徵九龍城寨邊界嘅龍津石橋先重見天日。

政府其後喺2021年經立法會財委會取得約6.9億撥款推動保育計劃,將遺跡原址打造成長約320米、闊30米嘅保育長廊,連接啟德站廣場同太子道東行人隧道,遺跡會被水景包圍,旁邊是行人休憩區。

《九龍城寨之圍城》近日揚威海外入圍第77屆康城影展,片中主角兼電影製片公司老闆之一嘅古天樂,日前喺康城行紅地氈時話,電影將已經拆咗嘅九龍城寨重現出嚟,某程度亦希望帶動到香港旅遊業。如果明年龍津石橋保育長廊如期完工,唔知會唔會成為吸引影迷打卡嘅景點呢?

相關字詞﹕九龍城寨;建築署

上 / 下一篇新聞