中文大學醫學院院長陳家亮後日（2月1日）卸任，由同為中大校友嘅趙偉仁接棒。中大醫學院今日喺facebook上載兩人對談片段，趙喺片中憶述當年仲係醫學生時，陳家亮已經喺腸胃科病房帶教，而自己要「被迫」企最後，「因為啲女同學霸晒頭位，個個都話：『嘩！陳家亮醫生好有型呀』」，講笑話自己學嘅嘢一定無女學生咁多。
趙偉仁喺片中形容，同陳家亮關係亦師亦友，又話中大醫學院成立最初10幾年唔夠教授，好多時要靠師兄姊教師弟妹，「你傳畀我，我又傳畀下一代」。陳家亮就形容趙隨和、人見人愛，無論幾咁「三尖八角」嘅人，趙都有辦法相處。
至於兩人最長試過工作幾耐無得休息，陳家亮話實習嗰陣試過on call（當值）96小時，其間加埋只係瞓咗5至6個鐘，形容係「人間地獄」。趙偉仁就話試過30幾個鐘無離開手術室，由朝早8點做到第二日下晝3點，「一日三餐都喺（手術室）裏面，不過無得沖涼。」
陳家亮被問到有咩錦囊畀趙偉仁，佢話每當遇上困難同挑戰，首先要問自己做院長嘅初心，然後選擇較難嘅決定，因為通常都是正確嘅決定。