即時港聞

Emily Online|紀律部隊連番出招 食字拍片、改編梅姐金曲宣傳區選  (21:52)

距離區選仲有唔夠一個月,各個政府部門頻頻宣傳,鼓勵市民當日投票。其中警方今(17日)喺facebook專頁上載短片,模擬喺髮型屋中,臉上搽咗剃鬚膏嘅副處長(行動)周一鳴提到,最近盛行染白髮,猶豫「漂唔漂頭好」。旁邊嘅副處長(國家安全)簡啟恩認為漂頭「好傷」,建議周諗真啲;副處長(管理)陳俊燊則指,「我頭髮仲咁黑,我就keep住啦」。而由處長蕭澤頤扮演嘅髮型師,仲大玩「食字」,話「頭可以唔漂,票就一定要投」,鼓勵選民投票。

另外,香港消防處救護員會今亦在facebook上載短片,改編已故藝人梅艷芳嘅代表作品之一《夢伴》,重新填詞為歌曲《選舉要出去》,由理事林珈樂主唱,及會員黃叡庭伴奏結他。林珈樂回覆本報查詢時,表示對本港有新制度進行區選感到開心,提到本港經歷唔穩定嘅時代,現重回正軌,而一個新選舉需要全港市民,包括紀律部隊同事支持,故希望透過音樂畀市民明白選舉重要性。佢話《夢伴》係一首家傳戶曉嘅樂曲,而填詞選用「老友」、「啱心水」、「獅子山」及「東方之珠」等廣東話字眼,希望不論對歌曲耳熟能詳嘅年長人士,或未聽過歌曲嘅年輕人,都會一齊出去投票。

相關字詞﹕區選 警方 香港消防處救護員會

上 / 下一篇新聞