日本上月起排放核污水，本周一（11日）完成首階段排放。日本駐港總領事館今日（16日）喺facebook專頁上載短片，提到總領事岡田健一近日到尖沙嘴一間日本餐廳，食用日本直送嘅海鮮，話要「用行動支持本港嘅日本食肆」。領事館回覆本報查詢，話要通過實際探訪支持據報陷入困境嘅本港日本餐廳，又表示有賴進口商同埋物流公司嘅支持，平日先可以喺本港食到新鮮可口嘅日本料理，想用呢個方式感謝所有支持日本餐廳嘅朋友。
短片名為「日本料理in香港：味力再発見」，岡田健一去到一間藍鰭吞拿魚專門店，點咗一份「豪華丼定食」，讚揚非常好食同足料，形容「係幸福嘅感覺」。日本駐港總領事館話，館方邀香港日本料理店協會挑選日本餐廳進行探訪，仲透露日後會作一系列嘅探訪，對如果能夠同本港嘅市民，一同透過享用日本料理嚟支持日本餐廳感到「無比高興」。