部分前任官員亦有獲邀出席七一慶回歸大會及新政府就職禮，包括前政務司長張建宗。張建宗現時擔任港大社會科學院客席教授，對可以與年青人交流感到高興，「我亦都有得着㗎，因為教學相長。」張建宗亦稱退休後經常運動，每日急步行一萬步，自言「keep得都算幾fit」。
今日典禮完結後，張建宗於會展附近現身，他去年底開始於港大任教，認為可以分享50年公共服務經驗及讓學生深入認識香港的機會難得，而且有機會與不同學院的學生交流屬寶貴經驗。
張建宗曾經形容自己為「一隻牛」，擔任勞福局長同政務司長期間從未放病假和大假。他稱退休後「自己時間多啲啦，多啲運動，每日平均超過一萬步，急步行，keep得都算幾fit。」
對於新任特首李家超，張建宗表示認識對方多年，形容「佢係做嘢嘅人嚟」，稱讚他「剛柔並濟」，希望外界勿先入為主。他又指，若新政府有需要，他隨時可以服務香港。