港聞

Emily Online|侯志強偕鄉事 區會搞流會不合作運動 (20:36)

北區區議員宣誓後,有11位議員過關,包括主席、非建制派羅庭德。作為當然議員嘅上水區鄉事委員會主席侯志強今日(11日)發出新聞稿預告,明日會喺區議會大會上聯同另外3位鄉事派當然議員、3位建制派「一致表決不跟隨港獨人士擔當北區區議會主席及譴責大會主席」,仲話會採取不合作態度,以流會行動表示不滿。

北區建制派宣誓前已狙擊羅庭德,話佢發表過「光復香港、時代革命」言論。羅庭德回覆Emily話,希望各位議員回頭是岸,強調佢係喺國安公署信納和民政事務局長徐英偉監誓下,同侯志強等人一同成為官方認可嘅愛國者。

羅又話,今次會議係倡議當局從大灣區內地城市覓地,新界原居民北上建丁屋興業發展,以彰顯中港一心,共建大灣區的決心。佢揶揄「愛國者本應同心同德,融入國家發展大方針」,但侯志強竟然喺呢個時候誹謗佢,搗亂得來不易嘅愛國者治港格局,亦有藐視港府和造反之嫌。

羅又提到,「對部分議員以激進手段表達政治訴求,使用脅迫手段,導致區議會流會癱瘓,走向『政治化』,與『完善選舉制度』的初心背道而馳,感到遺憾」。佢提醒議員連續4個月缺席會議將會喪失擔任議員嘅資格。

相關字詞﹕流會 侯志強 區議員宣誓

上 / 下一篇新聞