港聞

Emily Online|明報攝記鍾林枝拍疫下市民搶廁紙 奪消費權益新聞報道獎 (19:30)

第21屆「消費權益新聞報道獎」今日(8月31日)舉行頒獎禮,明報攝記鍾林枝喺舊年新型冠狀病毒疫情開始時,拍攝到有市民搶購到最後一盒廁紙嘅一幕。佢憑住呢幅名爲「絕無僅有」嘅作品,喺新聞攝影組別獲得銀獎。

阿枝話,舊年新冠疫情開始時,市民急於搶購防疫物資同埋日常用品,佢留意到網上有人話堅尼地城嘅超級市場入面嘅廁紙貨架被搶購一空。佢去到現場,咁啱見到有市民戴晒手套買貨架上最後一盒紙巾,同背後空空如也嘅貨架形成強烈對比,促使到佢想記錄低呢一幕。Emily恭喜晒阿枝,亦都恭喜一班得獎者!

另外,消委會今日都宣布,佢哋嘅消委會網址將會同《選擇》月刊網站合二爲一,革新瀏覽頁面,新加入超過100個冷知識、近60篇懶人包等等,提供免費消費指南畀消費者。另外,付費訂戶更加可以透過全新「篩選比較」功能,閱讀消委會評測報告嘅時候揀選自己心儀嘅幾個牌子出黎集中比較,十分方便!

相關字詞﹕消費權益新聞報道獎 鍾林枝 新聞攝影 超市搶購潮 新冠肺炎 新型冠狀病毒 編輯推介

上 / 下一篇新聞