港聞

Emily Online|第五代山頂纜車告別 市民稱排隊一小時仍值得 (19:00)

交通迷今日(27日)好忙碌,有港鐵屯馬線新車站啟用,亦有第五代山頂纜車告別市民,纜車站今日亦人山人海,唔少人同酒紅色嘅纜車「打卡」留影。第五代山頂纜車今日最後一日行駛,山頂纜車公司話,預料第六代新纜車要年底先投入服務,呢段期間市民上山頂暫時要改搭巴士、小巴等公共交通公具。纜車公司話,換新車涉及7億元嘅投資,話新車投入服務時會有加價壓力。

第五代山頂纜車今日告別派對,車站人山人海,唔少人趕嚟搭最後一程列車,有市民排隊逾一小時都話值得,唔少人駐足車廂前「打卡」合照。第五代纜車於1989年9月20日投入服務,行走32年,酒紅色車身更係特色之一,仲係第一輛備有兩卡車廂嘅山頂纜車,32年間曾服務1.38億名乘客。纜車公司話,其中一輛第五代纜車退役後,會放喺近堅尼地道路軌旁展覽。

香港上海大酒店有限公司物業部集團總監孫漫天及山頂纜車有限公司總經理曾瑛美今日係車站歡送訪客。纜車公司引入嘅第六代纜車,載客量增加七成半至210人,車站等候區亦會擴建,並提升各項設施,話最快12月投入服務,票價屆時會再公布。

第五代山頂纜車 相關報道:

市民歡送道別【多圖】

相關字詞﹕山頂纜車 第五代山頂纜車 退役 編輯推介

上 / 下一篇新聞