港聞

Emily Online|竹篙灣隔離營今起由國泰供「飛機餐」 林健鋒:味道媲美茶餐廳【短片】 (15:28)

竹篙灣隔離營提供嘅膳食被指質素差劣,國泰航空飲食服務早前獲邀請報價,提供竹篙灣隔離營餐飲服務。經民聯立法會議員林健鋒話,國泰今日(24日)開始已向隔離營居民提供食物,而據佢了解,依家隔離營住咗百幾人,國泰會提供早午晚三餐,仲話每一日都會盡量做到唔同款式,林健鋒試食過之後就話夠熱,味道「同飛機餐一樣」,又話「可以媲美茶餐廳」,以飛機餐標準會畀90幾分。

國泰今日送咗啲餐過去立法會,畀林健鋒等人試食畀意見,有4款主餐供試食,有飯、麵,亦有素食餐:

.泰式咖喱魚粒拼豆腐肉碎,時菜配白飯

.磨菇茄汁燒雞腿肉配牛油麵,青意瓜及南瓜

.西芹冬菇紹菜炒甘筍,玉子豆腐,時菜配白飯(素食)

.瑤柱白粥配肉碎炆豆腐時菜

林健鋒話,之前見到隔離營嘅食物咁劣評,都好唔開心,話既然國泰咁近竹篙灣,做咩唔搵國泰做?作為行會成員嘅林健鋒亦批評, 「點解一定要價低者得,政府唔應該食古不化。」林健鋒話,唔會期望投標形式嘅隔離營食物可以有飛機餐咁豐富,但相信國泰出品有一定保證,而且佢有地利優勢,最少可以提供到熱飯畀大家食,同埋唔會係「劣食」。

相關字詞﹕竹篙灣 隔離營 國泰 編輯推介

上 / 下一篇新聞