家住西營盤均益大廈嘅中西區區議員葉錦龍（Sam）昨晚（3月31日）要往隔離酒店檢疫，他今（4月1日）喺facebook發帖，批評民建聯楊學明對住佢同埋同車乘客，「狀甚開心地揮手大笑並大聲講『入到去要生生性性做人』」，又話民建聯社區主任劉天正喺隔離大笑，批評兩人做法係侮辱所有要強制檢疫、不幸感染新型冠狀病毒嘅人，包括今次嘅相關住戶，「其心可誅」。
楊學明同Emily解釋，當時因為已經公布隔離安排，但Sam仲喺大堂現場直播，佢有同事勸Sam「有病毒傳染他人就唔好」，Sam反駁「關你咩事」，雙方有啲口角，其後佢就對Sam講入到去生生性性、洗心革面，唔好傳染人，Sam就鬧佢「忠誠的廢物」。
楊學明強調，雖然雙方有口角，但其實佢唔係好開心，自己心情沉重，見到Sam要隔離，都擔心佢有咩事。