港聞

【Emily Online】珠海學院新傳系學生與PPRB總警司郭嘉銓交流 討論警媒關係 (18:13)

前年反修例風波爆發,傳媒採訪時遭到警方粗暴同不禮貌對待,要修復關係並不易。Emily發現,珠海學院新聞及傳播學系學生早幾日去咗警察總部,同PPRB總警司郭嘉銓交流。經了解後,原來今次交流活動係由同學主動提出,負責老師話同學們有好多嘢想知想問警方,討論內容包括警媒關係、前線警員不禮貌等,強調並無任何前設,並對於同學面對高官時不卑不亢感到欣慰。

根據珠海學院新傳系facebook,有十幾個學生喺星期三去咗警總參與交流會,而同學對當前警媒關係表達「極度關注」,特別係反修例期間,前線警員同現場採訪嘅記者關係日趨緊張嘅問題,亦問到警員對待記者有咩守則,點樣改善警媒關係等。

珠海學院新傳系高級講師李家聰話,今次活動並唔係校方安排,而係佢問同學們希望參觀邊度,佢哋話想參觀PPRB,「有好多嘢想知想問」,於是作出安排。佢強調交流並無任何前設,同學問乜都得,警方事前亦唔知道問題。佢認為同學們嘅要求合理,亦覺得將來做記者,「係咪認為對方做得唔啱、政見唔同,就唔訪問呢?」佢話同學面對高官時不卑不亢,作為老師好欣慰,無後悔安排今次交流。

其他報道:亞洲50最佳餐廳2021|香港大班樓奪冠 11間港餐廳上榜【附名單】

相關字詞﹕珠海學院 反修例 傳媒 警方

上 / 下一篇新聞