立法會前議員邵家臻營辦、致力倡議囚權嘅社企「石牆花」,早前呼籲市民捐贈舊版40克裝M&M's朱古力,因為生產商改版成37克裝,石牆花擔心因包裝改變而不符合懲教署認可物品清單規格,唔能夠送入監獄畀在囚者。呢個信息傳開後,石牆花收到大量舊版M&M's。邵家臻話直至今日(25日),收集到超過1000包,累積超過一個月嘅用量,呼籲大家暫時停一停,以免囤積過多物資造成浪費。
邵家臻話,連日來好多有心人奔波,有人去港九新界各區,甚至離島搜羅40克裝M&M's,形容係集腋成裘、聚沙成塔。邵家臻話由於未知懲教署幾時又會突然修改M&M's規格,所以叫大家暫時唔使再頻撲,話如已經購買,當然歡迎大家送上去;如果未購買嘅,就感謝大家嘅心意。