港聞

漢堡包店拒做晚市堂食 負責人:難核對資料 怕有人填錯被視違規 (21:58)

食肆重開晚市堂食第一天,有餐廳因不欲使用「安心出行」或要求顧客交資料,寧願不做晚市堂食生意。有漢堡包店稱或因此每日生意額少四成,「但條氣唔順」,盼堅持至「政府立法話去邊、做乜都要用安心出行」一刻。

位於灣仔漢堡包店Burger Home負責人周先生稱,不信任安心出行,也不欲顧客填資料,「你攞完咁冇晒私隱,之後做乜都得㗎啦」。他憂慮其餐廳有鮮明政治取態,會被政府部門特別針對,「你如果填錯一個字,我又冇得查你,咁其實冇意思。隔離舖就咁擺個箱,其實無理會(資料)。如果真係要認真對(資料),會冧晒檔。」他認為,難以逐一核對客人資料有否填對,若被放蛇,很大可能被發現有人亂填或填錯資料,因而被視為違規而罰停業。

周先生說,日常生意額有逾萬元,如果不做晚市會少四成生意,並稱目前在蝕錢,但與合伙人討論後,「掙扎咗一下就決定唔做」。訪問期間,有市民因得悉其餐廳不做晚市,光顧了800元外賣。周先生稱,會考慮早一點營業,加推早市彌補。

另一間餐廳「和記餐廳」負責人石小姐表示,餐廳本身營業到晚上7時,現在於下午5時半關門,連外賣也不做,預計生意額會少逾一成。她說:「實施呢樣嘢之前好多人都擔心,尤其是老人家會問係唔係唔嘟就冇得來食飯」,亦有好多客人擔心私隱。石小姐又憂慮如果有客人虛報資料要由她負責,「我唔想冒呢個風險,可能有啲人特登針對某一類食店入來填假資料」,權衡過後決定不做晚市。

石小姐說,疫下做餐飲業「唔輸已當賺錢」,數個月共蝕了5位數字,但她仍覺值得,「良心同錢,自己去衡量囉」。

相關字詞﹕新冠肺炎 新型冠狀病毒 新型冠狀病毒肺炎 晚市堂食 食肆 堂食 餐廳 安心出行 編輯推介

上 / 下一篇新聞