出土文物容易令人「話當年」。喺荔枝角公園埋咗21年嘅「文物時間囊」今日（29日）重見天日，下午有工程人員到場挖出時間囊，但當局未有舉行出土儀式。臨時區域市政局（臨區局）及臨時市政局（臨市局）喺1999年12月26日埋下時間囊，作爲千禧慶祝活動之一，當時預計喺2020年開封。
根據當年新聞稿，時間囊收藏兩局當時最新出版嘅年報、千禧年活動紀念品，以及議員自選物品，包括臨區局徽號、各大會堂及文娛中心當年12月文娛節目表、12月號「市政新聞」及臨市局領帶等。
深水埗區議員李俊晞、中西區議員葉錦龍今日到場直播解封，佢哋由朝早9點等到下午1點，工人先開始動工，最後用咗大約近3小時挖出時間囊。李俊晞話「守株待兔咗成朝」，但當局未有即場解封時間囊，稍後會安排展覽展示這件文物。