港聞

Emily Online.施政報告|張華峰WhatsApp問:幾時拎大閘蟹? (20:56)

【20:56更新】特首林鄭月娥今日(25日)喺立法會發表《施政報告》,宣讀時間超過兩個鐘,要時刻專注都唔係咁容易。好似政制及內地事務局長曾國衞喺期間曾經「閉目」休息,經民聯張華峰就喺度WhatsApp,原來佢買咗大閘蟹,仲問對方:「今天什麼時間來取大閘蟹?」

張華峰買咗足足9600蚊嘅大閘蟹,份量相當豐富,賣家同張華峰講:「您好峰哥,大閘蟹剛剛送來,現在您可以來攞」、「您看看是給支票還是現金9600元」,而張華峰就回覆4點左右叫司機拎。

張華峰後來喺facebook解畫,話原本今晚有個飯局宴請友人,但飯局因新型冠狀病毒疫情嚴峻而取消,不過「蟹已經訂了」,餐廳WhatsApp佢問佢幾時拎蟹,佢「只好在會議期間急急回覆」。

工聯會黃國健就同曾國衞一樣一度「閉目」休息,而旁邊建制派嘅何君堯就相當落力抄筆記,不過Emily見佢同民建聯蔣麗芸、工聯會郭偉強都冇戴口罩,而家新型冠狀病毒疫情咁嚴峻,雖然大家坐得唔算近、有一定社交距離,不過都係自求多福小心啲好。

施政報告專題:link.mingpao.com/66074.htm

其他報道:【Emily】泛民內會抗爭 民記EQ訂芒果 鄭松泰食花生 黃碧雲變勇武?(2020年5月19日)

相關字詞﹕施政報告 施政報告2020 林鄭月娥 張華峰 曾國衞 黃國健 郭偉強 蔣麗芸 何君堯 編輯推介

上 / 下一篇新聞