香港警察上周五（13日）喺facebook出咗一張「提子治郎•騙滅之刃」宣傳圖片，呼籲提防騙案。圖中警方角色「提子」，同最近大熱嘅日本動漫《鬼滅之刃》主角「炭治郎」造型非常相似，令網民質疑警方涉嫌抄襲、侵犯版權，話警方「知法犯法」。前香港眾志成員周庭尋日（16日）喺Twitter講呢件事，引起日本網民同TBS等日媒關注。周庭今晚（17日）再喺facebook更新指出，日本內閣官房長官加藤勝信已回應事件，話保護日本動畫嘅版權非常重要，會好好作出應對。
警方回應否認侵權，話今次圖片係環繞防騙吉祥物「提子」而構思同繪畫，「並不涉及對任何著作進行複製、安排複製或發放任何其複製品」。警方指出，製作呢張圖片，旨在向公眾傳遞簡單易明嘅防騙信息，並鼓勵市民提醒身邊親友，目的同性質都符合公眾利益。