港聞

Emily Online|元朗區議員伍健偉facebook挑戰何君堯Like數 (19:00)

元朗區議員伍健偉噚日喺facebook專頁出post,話如果一周內其專頁支持者少過立法會議員何君堯,會辭去區議員職務,「日後絕不從事任何政治工作,我會返去做返港豬同埋等差佬濫捕我」。截至今日下午6點半,佢嘅專頁讚好人數已由噚日嘅約8000人,上升到約11.5萬人。同一時間,何君堯專頁讚好人數就有14.8萬。

對於多個政圈中人質疑佢此舉兒戲,伍健偉話「絕對理解大家呢刻宣泄情緒嘅重點」,理解大家擔心選出嚟嘅民意代表係咪受情緒主導、為like用議席做賭注,會令人擔心呢個人嘅政治手段、執政能力,「理解嘅,期望嚟緊嘅行動可以令大家改觀」。

至於如果專頁like數唔夠何君堯多,係咪真係會辭職?伍健偉就話,政治人物所作承諾係必須履行,佢亦都唔係因為專頁讚好人數決定去留,而係交畀港人決定。

伍健偉噚晚出post後引起政圈熱議,多個本土派都批評,屯門區議員張可森話,like數係反映想宣揚嘅理念可以去到幾遠,如果覺得自己like數唔夠,會希望用理念、工作,說服港人一齊並肩作戰。元朗區議員王百羽就質疑,伍健偉用7.21同辭職去情緒勒索、呃大家like自己個page,又話伍健偉賣關子、冇諗住真係辭職。

伍健偉同Emily講,佢目的唔係只為專頁有更多人讚好而利用議席做賭注,係希望得到足夠多人嘅關注,推動想做嘅事,包括抗爭活動去向。

其他報道:青協調查:近兩成受訪青年曾吸食大麻 有個案曾月耗近2萬元買大麻

其他報道:內地拘逾10人擬偷渡台灣包括李宇軒 鄧炳強:若涉事者被通緝會交港處理

其他報道:7.21事件警昨稱18分鐘到場 鄧炳強今稱30多分鐘「無意改寫歷史」

相關字詞﹕伍健偉 何君堯 讚好 區議員議席 編輯推介

上 / 下一篇新聞