港聞

【Emily Online】第六屆立法會結束 容海恩主動搵葉劉自拍 (08:24)

第六屆立法會噚日正式曲終人散,有18位議員告別議會不爭取連任。噚晚立法會主席梁君彥宣布休會後,民主派同建制派分開影大合照,建制派沿襲傳統喺會議廳內留影,但影完兩張相先發現民建聯陳克勤未到,跑入會議廳嘅陳克勤被建制派同事喝倒彩,因為又要再影過。

聲稱因家事不連任、只做了一屆嘅民建聯柯創盛步出會議廳獲助理迎接,柯仔眼有淚光,話辛苦同感激大家。而退下火線交棒嘅民建聯梁志祥噚日著上中山裝開最後一次會,佢同Emily講呢套係佢上任宣誓嗰陣著過,噚日再著希望好頭好尾,助理喺會議廳外送花畀祥哥。

新民黨主席葉劉淑儀同容海恩因為黨內初選公開鬧不和,容海恩因而退出初選,最後仲決定唔爭取連任,佢噚日主動搵葉太自拍。

至於民主派議員就落到地下大堂影相,笑聲同掌聲不絕,佢哋除低口罩影大合照,影完又大嗌口號「五大訴求,缺一不可」。

公民黨陳淑莊(Tanya)唔會參選9月嘅立法會選舉,黨友楊岳橋準備咗個小小驚喜,影相前送咗束花畀Tanya,Tanya笑到見牙唔見眼。

唔少民主派議員都趁機「集郵」,民主派3位女將,Tanya、議會陣線毛孟靜同民主黨黃碧雲搭肩合照。兩位最資深議員梁耀忠、涂謹申都有私下影相。

第六屆立法會結束 相關報道:

今屆立會結束 開會時數3屆最少逐人破紀錄 梁君彥總結:有時不知誰是人誰是魔

泛民建制無合照 胡志偉:想不到原因企埋一齊

第六屆立法會結束 梁君彥冀來屆議員理性包容 泛民另行大合照喊口號

相關字詞﹕立法會 第六屆立法會 容海恩 葉劉淑儀 陳淑莊 柯創盛 編輯推介

上 / 下一篇新聞