即時港聞

【Emily Online】張竹君不開記者會仍上班 連續82日返工因要「睇檔」 (22:15)

新型冠狀病毒疫情放緩,香港連續4日零本地確診,衛生防護中心傳染病處主任張竹君亦連續4日無舉行記者會,無同大家喺鏡頭前見面。不過咪以為佢終於可以放吓假,據Emily所知,佢仍然日日返工,星期六、日都無得休。截至今日(29日),張竹君已經連續82日返工,無完整咁放過一日假。【12月5日報道:張竹君首次缺席疫情記者會】

事關衛生署每日都要等到下晝1點幾至2點,先知道當日有無確診個案,張竹君朝早要返辦公室「睇檔」,等化驗結果,有個案就準備開記者會,無個案就可以早啲放工返屋企抖吓。

除咗張竹君,衛生署上上下下其實唔少人都仍然過緊無假放嘅日子,包括幾個高層。疫情雖然稍為緩和,但每日仍有數以百計、以至千計嘅人入境,衛生署每日要睇住所有航班,安排乘客去亞洲國際博覽館或富豪東方酒店等候檢測結果,成個流程要好精準,功夫實在唔少。

對於坊間對張竹君嘅厚愛,有政府中人話都算係疫情中嘅好事,畀巿民知衛生署真係有專家,呢份觀眾緣,佢話係用血同汗換返嚟。

新冠肺炎 相關報道:

英國確診新冠肺炎男子 昨乘飛機抵港直送東區醫院治療

首批300名滯留巴基斯坦港人明日乘政府專機回港 另170人今自行返港

中大招3000無症狀港人 分析新冠病毒隱性患者比率

相關字詞﹕抗疫新階段 新冠肺炎 新冠病毒 新型冠狀病毒肺炎COVID-19 新型冠狀病毒肺炎 新型冠狀病毒疫情 新型冠狀病毒香港 2019冠狀病毒病 張竹君 衛生署 衛生防護中心 編輯推介

上 / 下一篇新聞